Sat 25 Dec 23:13:21.086959 2021
దేహ భాగాలకు గడియారపు ముళ్ళనతికించుకొని
నిర్వచించలేని దీర్ఘ మౌనాల మధ్య
మాటలకు సంకెలలు వేయబడుతున్నపుడు
బయటకు రాలేని అర్థవంతమైన భావనలు
నినదించే ప్రయత్నం
గతాల శోధనలో భవితకు వెలుగులందివ్వాలనుకునే
తపోదీక్షాపరులు
సంస్కరణాభిలాషలు లోపాల అన్వేషణలలో కొందరు
అభిరుచులకై అరువివ్వని కాలానికి నిద్రను
కానుకగా ఇచ్చే రాత్రులు
అనేక సంఘర్షణల పర్యవసానాలు
కలవరపడ్డ హదయం
ఒకానొక రోజు తన గాథలను
కొసలలోంచి కన్నీరొలికే చోట
ముంగురులు అల్లరి చేసిన చోట
నిశ్శబ్దంగా విస్తరిస్తుంది
ధూళి పైనా భానుకిరణాల పైనా
అభియోగం వేస్తాం కానీ
గడిచిన కాలపు అంతర్మథనాల
వ్యూహాత్మక ప్రణాళికే కదా ఇది
నువ్వు నీ పైనా ఈ లోకం పైనా
మనసు పడినపుడు
అంతరంగం మౌనంగా రాసే
బహిరంగ ప్రేమపత్రం పిగ్మెంటేషన్‌
- డా|| కాచాపురం దుర్గాదేవి,
7893093495
మీ స్నేహితులకు రికమెండ్ చెయ్యండి
