తెంపితే తెగిపోవడానికి దారం గాదు
తగులబెడితే బూడిదై పోవడానికి కట్టేగాదు
ఊదితే పగిలిపోవడానికి గాలిబుడుగ గాదు
కుదిపితే కూలిపోవడానికి బర్లకొట్టం గాదు
అతనొక మేరు పర్వతం

దేశానికి తోవ చూపిన నేత
పరిపాలనకై
సంవిధానాన్ని అందిచ్చిన విశ్వ మేదావి
స్వేచ్ఛ సమానత్వం సౌబ్రాతత్వాలను
దోసిట్లకొంపిన సమతామూర్తి
పేరునే జీర్ణించుకోలేక పోతున్నరు
సాటి మనుషులనెప్పుడు సమంగా చూస్తరు

ప్రపంచీకరణ ప్రయివేటికరణ సరళీకరణలా
అసమానతలతో పరిగెత్తిపోతున్న దేశం
వివక్షల స్వాతంత్య్రం
బొడ్రాయిపండుగలా వెలిగిపోతున్నది

నీ కండ్లుల్ల నీవే ముండ్లు గుచ్చుకొని
నిన్నునీవు గుర్తించుకుపోలేకపోతున్నవు
తోటివారిని కీర్తించలేకపోతున్నవు
మురుగు పూసుకొని ఊరేగి
ప్రపంచానికెట్ల ఆదర్శమైతవు
మనిషిగా ఇంకెప్పుడు మిగిలిపోతవు
మహౌన్నతుడిగా ఇంకెన్నడు నిలిచిపోతవు

ఓ విద్వేషకుడా !
సమదష్టిలేని నీ దక్పథాన్ని
నిలువునా తగులబెట్టు
కుల్లిపోయిన మనుసును నిలువునా పాతిపెట్టు
పురుగుపట్టిన నీ ఆత్మకు పిచికారిచేయి
పరిమళమేలేని నీ మనుసును నలిచేయి

నది ప్రవహించడమే బాధ్యత
మొగ్గ పుష్పించడమే విధి
చెట్టు విస్తరించడమే హరితాశయం
రత్నం మెరువడమే గుణం
నీవు కుంచించుకుపోవడమే లెజెండ్‌

దేశం తలనిండా పుండ్లను చూసి
ప్రపంచం తుప్పున ఊస్తున్నది
అఖండ భారత్‌ కాదు
అంటరాని అమానవీయాల భారత్‌
కుటిల కుట్రల వజ్రోత్సవాల భారత్‌ !

(అంబేద్కర్‌ జిల్లా కోనసీమకు మద్దతుగా)

- వనపట్ల సుబ్బయ్య, 9492765358