వెచ్చని పచ్చనిచీర కట్టుకొని
కన్నుల్లో కైపుల్ని నింపుకొని
కవ్విస్తూ వుంటాయి
అటేపు కొండలు
ఎంత ముద్దుగా బొద్దుగా వుంటాయో
పొద్దు పొద్దున్నే సూత్తూనే వుంటానా
ఇంతలోనే పొద్దువాలిపోద్ది
మురిసి మైమరుస్తూ బ్రతుకంతా
ఎదురు చూపుల ప్రేమపక్షవుద్ది
ఎక్కుతెగాని ఎత్తులు
దిగితేగాని లోతులు తెల్వదాయే

కాలం కాళ్లను కట్టేసినట్టు
నేనటు పోయెట్టులేదు
దారులన్నీ మూసుకు పోయినట్టు
ఎప్పుడూ ఏవో తెలవని ముళ్ల కంచెలు

ఆశ గుదిబండై బరువెక్కుద్ది
రకతం సలసల సలుపుతూనే వుంటది
తనువు తన్లాడుతూనే వుంటది
తీరని దూరపు ముచ్చట్లన్నీ
సిల్లుబడ్డ కుండలోంచి
జరజరా జారిపోతుంటయి

కోరికలకు రెక్కల్ని తొడిగి
గిజిగాడిలా శ్రమించినా
దిగులుగూడు మారదాయే
దూరమెపుడూ
చిక్కగా చక్కగా నునుపుగా
కళ్ల బడుతూనే వుంటదికదా..

మిన్ను విరిగి మీద పడ్డట్టు
ఎదలో ఎప్పుడూ ఏదో మోయలేని బాధ
అశువులను ఒలికిన కళ్ళు
తేలికవ్వాలి..తేటతెల్లం కావాలి
బరువు తగ్గకుంటే..
ఇంకాస్త బోరుమని ఏడ్వు
పొరలు పొరలుగా తొలగిన మసకలు
దశ్యాలను ఫ్రస్ఫుటం చేస్తుంటయి

దూరపు కొండల్ని వొక్కపాలె
తనువును నిలువెల్లా విరుచుకుని చూడు
భ్రమలన్నీ
శిథిలమైన మట్టి గోడల్లా
పెళ పెళా రాలిపోతాయి
చూపులు నగపునీతమవ్వటానికి
రెప్పపాటు కాలం చాలదూ

నువ్విప్పుడు నిలబడ్డ చోటే
నీడల ఊడల చెట్టయితది
ప్రశాంతంగా సేదతీరుతావు
సత్యం బోధ పడింది కదా..
కొండనాలుక కూడా కోయిలై కూస్తాంటది
ఇక దూరపు కొండల్ని నువ్వెప్పటికీ ఎక్కవు
కోర్కెల దీపం కొండెక్కుతుంది..!

- డా.కటుకోఝ్వల రమేష్‌
  9949083327