అప్పుడేమో..
'అస్తిత్వ పోరాటం' పేరు చెప్పి
ధూంధాంగ
ప్రజల్ని పరకాయం చేయించి
ప్రత్యేక ద్రోహుల్ని
అమాత్యులుగ అందలమెక్కిచ్చినవ్‌ !

ఉన్నపళంగ ఉద్వేగాల్ని రెచ్చగొట్టి
జీవిత ఆకాంక్షల్ని..
ఆకాశమంత ఎత్తుకు ఎగదోసి
ఎన్నో చితులకు ఆరనినిప్పు వెట్టినవ్‌ !

ఇప్పుడేమో..
పార్టీని 'పాన్‌ ఇండియా' అంటున్నవ్‌ !
సేతెవ్వనిది? సాతెవ్వనిది ?
ఇంక నయ్యం రెండు దేశాలంటలేవ్‌ !!

జలాశయాల్లో నిండామునిగి
నాశనమైనా సస్యశ్యామలమైతమని
భూములకు, భూములు
ఇండ్లకు ఇండ్లు..
త్యాగం చేసిన మట్టిమనుషులకు..

ఎతల్ని ఎత్తిపోతల ప్రాజెక్టులు సేసి
పరిహారమడిగితే..
నడిరోడ్డు మీద ఇనుప సంకెళ్ళేసి
ఒర్రంగ ఇజ్జతి మానం తీసినవ్‌ !
(నీళ్ళు..1)

నిధులన్నింటిని
దేశోన్నత పథకాలుగ విభాగించి
'మిషన్లు', 'కమీషన్లు'..
అతి సం'క్షేమం'గ భ్రమించి
వరుసగ అందలమెక్కుతున్నవ్‌ !
(నిధులు..2)

నీ పాలనలో 'ఉద్యోగ ప్రకటన'
నిరంతర దృశ్యవార్తా స్రవంతి!
నిరుద్యోగుల పాలిట
ఎన్నటికీ ఆరని దీపపు వత్తి !!
(నియామాకాలు..3)

ఎవ్వనికి, ఎక్కడ
ఒరిగింది, జరిగిందేం లేదు.
ఎక్కడేసిన గొంగడి గక్కన్నే వున్నది !
నీ ఒక్క 'ముఖ్య' పదోన్నతి తప్ప !!

ప్రధాన పాలకా!
చేసే పనికి, వచ్చే ఫలితానికి
ఒక చారిత్రక పరిణామముంటది.
ఎంత 'కంపు' ఐనా
ఎంతకాలం 'ఇంపు' ఐతది ?
నో రూల్‌ ! బట్‌ ఇట్స్‌ వెరీ క్రుయల్‌ !!

మాట్లాడే హక్కును హరించినవ్‌ !
ధర్నాచౌక్‌ కర్కశంగ ఎత్తేసినవ్‌ !!
నిరసనంటే నిప్పులగుండమైతవ్‌ !
ధిక్కారానికి అగ్గిమీద గుగ్గిలమైతవ్‌ !!

తీరం దాటినంక గిట్ల
తెప్పలకు తెప్పలు తగులవెట్టెటోళ్ళకు
ఎప్పుడో ఒకప్పుడు
ఉద్వాసన తీవ్రత తప్పనిసరి !

సొంతిల్లునే పూర్తిగ గెల్వలేనోళ్ళు
బయటోళ్ళను ఎట్ల ఓడిత్తరు ?!
గిదంత ఉత్త 'నాన్‌ పాన్‌ ఇండియా' !!

- అశోక్‌ అవారి
  9000576581