- జూ పార్క్‌లో కొత్తగా మూడు ఆకర్షణలు
- మీర్‌క్యాట్‌, మర్మోసెట్‌ ఎంక్లోజర్లు, ఫిష్‌ పాండ్‌ను ప్రారంభించిన పీసీసీఎఫ్‌
- జూ పార్క్‌లో ఘనంగా 68వ వన్యప్రాణి వారోత్సవాలు, 59వ జూ పార్క్‌ డే ఉత్సవాలు
నవతెలంగాణ-ధూల్‌పేట్‌
నిత్య నూతనంగా వెలుగొందుతూ.. దేశంలోనే ప్రముఖ జంతు ప్రదర్శనశాలగా హైదరాబాద్ నెహ్రూ జూలాజికల్‌ పార్క్‌ పేరుపొందినదని అటవీ సంరక్షణ ప్రధాన అధికారి, హెడ్‌ ఆఫ్‌ ఫారెస్ట్‌ ఫోర్స్‌ ఆర్‌.ఎం. డోబ్రియాల్‌ అన్నారు. 59వ జూడే ఉత్సవాలు, దేశవ్యాప్తంగా జరుగుతున్న 68వ వన్యప్రాణి వారోత్సవాల్లో భాగంగా తెలంగాణ అటవీశాఖ నెహ్రూ జూ పార్క్‌లో ప్రత్యేక కార్యక్రమాలను నిర్వహించారు. ఈసందర్భంగా కొత్తగా మూడు ఆకర్షణలు జూ పార్కులో తోడయ్యాయి. దక్షిణాఫ్రికాలో కనిపించే ముంగిస జాతికి చెందిన మీర్‌ క్యాట్‌, దక్షిణ అమెరికా అడవుల్లో కనిపించే చిన్న కోతి జాతికి చెందిన మార్మో సెట్‌ ఎంక్లోజర్లను ఆయన ప్రారంభించారు. జూలో వివిధ రకాలకు చెందిన చేపలతో కూడిన కొత్త వాటర్‌ ఓపెన్‌ ఫిష్‌ పాండ్‌ను ఆవిష్కరించారు. అనంతరం కొన్నాళ్ల కిందట జూలో జన్మించిన ఆసియాటిక్‌ సింహం (ఆడబిడ్డకు) అదితి అని నామకరణం చేశారు. జూ పార్క్‌లో జూడే సెలబ్రేషన్స్‌లో గతేడాది చెందిన నెహ్రూ జూలాజికల్‌ పార్క్‌ వార్షిక నివేదికను క్యూరేటర్‌ రాజశేఖర్‌ చదివి వినిపించారు. అనంతరం ఆయన మాట్లాడుతూ ఇక్కడ పనిచేస్తున్న జూ సిబ్బంది అంకిత భావం వల్లే, సరైన నిర్వహణతో దేశంలోనే ప్రముఖ జూ పార్క్‌గా ప్రశంసలు అందుకుంటోందని వెల్లడించారు. సందర్శకులు కూడా జంతువుల పట్ల బాధ్యతగా వ్యవహరించాలని, పిల్లలకు అడవులు, జంతువుల పట్ల ప్రేమ పెరిగేలా తల్లిదండ్రులు చూడాలన్నారు. వచ్చే ఏడాది డైమండ్‌ జూబ్లీ వేడుకలు ఘనంగా నిర్వహిస్తామని పీసీసీఎఫ్‌ వెల్లడించారు.
నెహ్రూ జూ పార్క్‌ క్రమంగా కరోనా ముందునాటి పరిస్థితులకు చేరుకుంటుందని సందర్శకుల సంఖ్య కూడా క్రమంగా పెరుగుతున్న నేపథ్యంలో వారికి అవసరమైన సౌకర్యాలను అందించేందుకు జూ పార్కు కృషి చేస్తుందని జూ పార్క్‌ డైరెక్టర్‌, అదనపు పీసీసీఎఫ్‌ వినరు కుమార్‌ వెల్లడించారు.
అవార్డులు
జూ పార్క్‌ నిర్వహణలో నిబద్ధతతో పాల్గొంటూ కార్యక్రమాలు సజావుగా నిర్వహిస్తున్న ఉద్యోగులకు కేవీఎస్‌ బాబు మెమోరియల్‌ అవార్డులను ఉన్నతాధికారుల చేతుల మీదుగా అందించారు. అలాగే జూలో నిర్వహించే వివిధ కార్యక్రమాల్లో పాల్గొన్న పాఠశాల విద్యార్థులకు బహుమతులు ప్రదానం చేశారు. జూ పార్క్‌లో జంతువులను దత్తత తీసుకున్న సంస్థలు, వ్యక్తులు, జూ పార్కు నిర్వహణ కోసం విరాళాలు ఇచ్చిన సంస్థలు, వ్యక్తులను ఈ సందర్భంగా జూ యాజమాన్యం సత్కరించింది. కార్యక్రమంలో అటవీశాఖ ఓఎస్డీ శంకరన్‌, రిటైర్డ్‌ అటవీ అధికారులు బుచ్చి రామ్‌ రెడ్డి, నాగభూషణం, డిప్యూటీ క్యురేటర్‌ నాగమణి, ఇతర జూ అధికారులు, సిబ్బంది పాల్గొన్నారు.
