''పిలగాడు సక్కగున్నడు.. గీయినె పేరేంది''
''వీని పేరు రాముడుగనీ.. రామని పిలస్తం.. బద్రాజెలం మొక్కినంక మాయామెకు కానుపందింది.. అందుకనే గాపేరు బెట్టుకున్నం యాటాబోయి నిదరజేశొస్తం''
''ఓరెక్క పేర్లు సుత గుదిరినరు తిరు..
అవుగామాల గపిల్లపేరు జానికిగదూ
''ఇగో గీ వీడు మా శిన్నోడు ఈని పేరు పోలురాజు''
''మరెగనీ.. మీయ్యేపోళ్లెవళ్లు అవుపడ్తనే లేరేంది పిల్వ లేదా''
''నాకన్నదమ్ముల్లేకపాయె శెళ్లెలొక్కతున్నది గానీ ఆమె బిడ్డెని కాదన్నమని అలిగింది''
''గట్లనా.. ఏమాయె కత ఎందుకొద్దనుకున్నరు మేనిరికెం''

''గాపిల్ల మస్తు సక్కడిదే గానీ.. కాలేజిల ఎవడొ ఎమ్మటి వడ్డడంట.. గీపిల్ల ఎదురు దిరిగి పిన్సుపాల్‌కి పిర్యాదు జేసింది.. ఆడు గది మనుసులో బెట్టుకొని ఒకదినం చిడాయించ బోయిండంట గీపిల్ల అరిసి లొల్లి జేశెటాల్కె ఆడు ఇడిసి పారి పోయిండు గానీ ఊరెసుమంటిది.. ఇగో పులంటె అగో తోక.. ఇంతుంటె అంతని పుకార్‌ లేపిన్రు.. గది అటుబడి ఇటుబడి మావోని శెవులబడేటాల్కె ఆత్‌ నా కొద్దుపో అన్నడు.. నేను శెప్పి సూద్దమని అనుకున్న గానీ ఎందుకో శెప్పబుద్దిగాలె వానలు బడితె వాతలు మానతయా.. ఎంతైనా శెడ్దపేరు శెడ్దపేరే గదా''..
''ఇదీ పల్లెటూరేగద ఒదినే మళ్ల ఈడగూడ గుప్పుమనదా, ఇదో గీ పిలేట్‌ దీస్కోన్రీ''..
''పలారాలకేం తొందర తిందం లే''..
''కానియ్యురి కానియ్యురి గదిగదే గిదిగిదే ఎటు నడిశేటిదటు నడుస్తనే ఉండాలా''..
''నాకు బయిటి సమ్మందం ఇంగోటచ్చింది గాని గాపిళ్ల ఎప్పుడు జూడు సెల్లుఫోన్‌ వత్తుకుంటనే ఉంటది, బట్టలు గూడ మిడ్డీలు, గౌన్లేస్తది''..
''పెండ్లైనంకనన్న గియ్యన్ని మానుతవా అంటె వాడత లేడా... మీఅబ్బాయి ఫేస్బొక్కు, వాట్సాప్‌ ఆయినేస్కుంటలేడా ఇష్టమైన బట్టలు అని తలెగరేశింది... వామ్మో మాటకు మాటనేటామె మనకెందుకనుకొని సాలిచ్చుకున్నం''
''మాపిల్లకైతె నోట్లె నాలికేలేదు''
''గతికితె అతకదంటరుగనీ మరీ దూరపోళ్లమా మనమేమన్న బీరకాయ పీసేనాయె'' అని బోజనాలకు వొత్తిడి జేసింది వలరాజు తల్లి రాదమ్మ.. ఒక్కపాలే తింటం లే పప్పన్నం అని మొగోళ్లన్నా రోళ్లుబగిలే రొయిణెండ బయట బగ్గుమంటండెటాల్కె బయిలెల్లటందుకు మొగ్గుసూపలేదు ఆడోళ్లు.. పయిటీలి మూడింటికి అన్నం దిన్నంక ఆమాట ఈమాటలకెళ్లి రాజకీయ కపుర్లలోబడ్డరు మొగోళ్లు.. ఈటల రాజేందర్‌ రాజకీయ బవిషెత్తేంది, యాంజల్‌ బూముల ఆక్రమణ నిజమేనా.. గంగుల కమలాకర్‌ ఆరోపణ జేశినట్టు బీసీ ముసుకుల రెడ్డిపోకడ బోతన్నడా.. సొంత పారిటీ బెడితె కేసీఆర్‌ని డీకొడతడా అని సెర్చలల్ల మునిగిన్లు.. రెడ్డి మాటచ్చెటాల్కె.. నాకొడుక్కేమన్న సమ్మందముంటె జూడుర్రి మీఊళ్లె కుదిరితె గీ ఎండల్లనే జేత్తం అన్నడు జంగిరెడ్డి.. జంగిరెడ్డి ఎంకయ్యోళ్ల గ్యామ సరుపంచు పెండ్లి సూపుల కోసం గాయన్ని తోడబుట్టిన శెల్లెలు అన్కమ్మని, ఇంటి సుట్టుపట్లుండే ఇంగో ఇద్దరు ఆడమనుసుల్ని, ఇంగో మొగమనిసి గురువయ్యని ఎమ్మటి తోల్కచ్చుకున్నడు ఎంకయ్య. కట్నం పట్టింపు గూడ లేదులే మావోడు అమ్రికల కొలువు జేత్తండు అని అన్నడు.. శేతిని శెత్రి కొక్కెమ్మీద ఆనిచ్చుకుంట.. గట్లనా పేరేంది మీ ఓనిది అన్నడు వలరాజు.. లంకేశు.. చెప్పిండు జంగిరెడ్ది..
నాలుగు దాటతాందనంగ.. ''లాష్టు బస్సన్న అందుకోవాలె .. ఇగ మేం బోయొత్తం బావ.. ఈడికెల్లి వరంగల్లు దాంక ఎట్లనోపోతం, ఆడ నుంచి మైబ్బాద్‌కు చేరతం గనీ ఆల్శమైతె మళ్ల మైబ్బాద్‌ నుంచి మా ఊళ్లెకు బోయె బస్సు దొరకదు.. గప్పటికే పొద్దుగూక్తదో రేత్తిరైతదో.. అయితాయె బాటన బడతం నడుసుడేం కొత్తగాది గానీ అదేందో కర్ప్యో, గిర్ప్యో అంటగద పోలీసోళ్లు అడ్దం దిరుగుతరు.. చల్‌ టేసనికి నడువుండ్రంటె తక్లిబైతది.. ఇయ్యాళ ఐతారమనిట్లచ్చిన రేప్పొద్దుగాళ గొడ్లిడవకపోతె మాటొత్తది.. ఇన్నేళ్లు గింత మాటరాకుండనే బతికిన''.. బొడ్లో దోపుకున్న పంచెని కిందికిడుసుకుంట అన్నడు గొడ్లెంకయ్య.. ఇంటిపేరేమో ఉండె గాని ఊళ్లె అందరు గొడ్లెంకయ్య, గొడ్లెంకయ్యని పిలుసుట్ల గదే కాయమయ్యింది..
ఎంకయ్య పెండ్లాం బూలచ్చిమి శీర గోసిబోసుకుంటంటె అచ్చుకుంట అద్దం, కుంకమ అందిచ్చింది పిలానితల్లి ఆదెమ్మ.. రూపాయి, అద్దరూపాయ బిళ్ల్లు శెల్లకుండ, కనవడకుంట పాయె గానీ.. బూలచ్చిమి మొకమ్మీద బొట్టుజూప్తా.. ''అగ్గో గట్లుంటది'' అని యాద్దెచ్చుకుంటరు ఎనకటోళ్లు... గామె శామనసాయ కోలమొకం మీద ఎర్ర బొట్టు మస్తందంగుంటది..
లోపలికిబోయి ఇంతల ఇత్తడి గిలాసలల్ల చా బోస్కచ్చింది ఆదెమ్మ.. ఆమె గిలాసలందిత్తంటె..
''రొండు బర్లు ఎండిపోయినరు మ్యాకపాలు మాయి'' అన్నడు ఆదెమ్మ మొగడు వలరాజు.. ''అయితాయె తిరు బావ అలవాటెమాకు'' అన్నడు ఎంకయ్య.. బూలచ్చిమి శీర కొంగుతోని బట్టుకుంది గిలాసను కాలకుండ.. ఎంకయ్య ఆశెతులకీశేతులకు తిప్పుతన్నడు గిలాసని, వలరాజు ఊదుకోనూదుకోని తాగుతన్నడు..
''ఎన్నన్నజెప్పు శారు గిట్ల గిలాసడుదాగితెనే కుతిదీర్తది'' అనంగనే.. ''మేమంతే.. మానాయిన లోటడు దాగిటోడు... ఇప్పటికి బెల్లమే వాడతం.. శాపత్త గూడ మారుస్తలేం... గా మూడు పూలదే''.. అన్నడు ఎంకయ్య మీసాలకంటుతన్న శారు సుక్కలు తుడ్సుకుంట..
''అందుకేనాన్వయ నీ బిడ్దెలు సుత మూడుపువ్వులోలె ఉన్నరు సక్కంగా'' అని శెమత్కరిచ్చిండు జంగిరెడ్డి...
''అసలికెప్పుడో అయిపోవు.. మేమెప్పుడో ఉగాది ముందొచ్చి మా ఇల్లువాకిలి సూడురంటిమి. మీరు ఇగ్గో అస్తరు అగ్గో అస్తమని ఎన్ని దినాల్సంది అంటున్రి.. దేవుడి పెళ్ళెళ్లిపాయె నెలలు గడిశిపాయె'' నిష్టూరంగ అన్నడు వలరాజు..
''గొడ్ల ఒప్పందం దేవుడిపెళ్లితో తీర్తె పురసత్‌ దొర్క్తదని ఆగిన బావ.. ఇంతల కత్తెర జొరబడిందని ఆగిన'' అన్నడు ఎంకయ్య..
''మీదె ఆల్శెం మేమైతె తూగుమీదనే ఉన్నం.. ఇండ్లు కొట్టాలు సుత బాగుజేపిచ్చినం అన్నడు'' వలరాజు..
''సరె ఇగ బయిలెల్తం మబ్బు బడతంది.. వానో ఒరుపో''.. అన్నడు జంగిరెడ్ది చెత్రి శేతవట్టుకుంట..
''సరెసరె పోయిరారి సల్లంగ'' అన్నది రాదమ్మ వాళ్లని సాగ దోలటానికి కుంటుకుంట బయటకచ్చుకుంట..
మొగులు గప్పుడె ముసురుతాంది.. ఇంట్లకెల్లి బయటకచ్చి ఆటోరిచ్చ కోసం ఎదురొసూస్తుండంగ.. ''ఎమో ఎంతకొస్తలేవు ఆటాలూ'' అన్నడు గురువయ్య పంచెగోశి పయిలం జేసుకుంట
''ఆడసెంటర్ల ఉంటరు ఒకటొరొండొ.. జెనం నిండితెగాని బయలెల్లరు'' అన్నడు వలరాజు.
శిన్నె కొడుకు పోలురాజు... ''బండేసుకోని పోయి చెప్పిరాపోర ఈడ ఆరుగురున్నరని'' తోలిచ్చిండు వలరాజు కొడుకును..
''ఇల్లెంతమటుకచ్చిందే అన్నది ఆదెమ్మ..''
యాడ శెల్లె కంకర, ఇటికెలు దోలిచ్చిండు మేస్త్రి ఇంతల కూలోళ్లు టయిక్‌ షురువు జేసుట్ల పని గట్లనే ఆగిపోయింది.. ఆ తరువాత మేస్త్రికి కరోనా అచ్చి ఆస్పటాళ్ల పన్నడు.. ఇగో అగో అనుట్ల ఇంతల కత్తెరొచ్చి పడింది''.. అన్నడు ఎంకయ్య తుండుగుడ్డతో శెమట తుడుసుకుంట..
''ఇప్పటికే కూళ్లుబగ్గుమంటాన్నరు గయిసాలవంటనా ఇంగ్యాడ గడత ఇండ్లు అయిపాయే'' అన్నడు వలరాజు..
''శెప్పచ్చిన్నే నలుగురు గాంగనే అత్తనన్నడు ముత్రాశోళ్ల రాముగాడు'' అని జెప్పిండు పోలురాజు బండాపుకుంట..
''అచ్చినప్పటిసంది జూత్తన్న శెళ్లె ఏందో అనబోయి ఆగుతాన్నవనిపిస్తాంది ఏమన్న ఉన్నదా చెప్పేటిది.. మీ వదినెను అట్ల పక్కకు దీస్కపొయ్యన్న జెప్పరాదు ఏమన్న ఉంటె అని ఎంకయ్య అంటండగ.. ''ఏమున్నది ఏంలేదు.. మావోడు మాతోనొచ్చుడుకంటె ముందే మీపిల్లనొకపాలి జూత్తడంట.. మీఊళ్లె ఆని దోస్తుగాళ్లున్నరులే ఒకనాడు ఆళ్లకాడికచ్చి మంచిశెడ్డ ఆరదీసి అస్తడంట.. గిదే శెప్పు శెప్పు అని తల్లిని వదబడతాండు మావోడు'' అన్నడు వలరాజు పకపక నవ్వుకుంట...
''గట్లనే జేయున్రి తప్పేమున్నదిండ్ల.. మాపిల్ల బంగారం.. అన్నరు ఎంకయ్యతో వచ్చిన నలుగురిలో ఒకరిద్దరు..
''అదైనంకనే మేం మా అయినోళ్లను దీసుకోస్తంలే.. మావోనికి నలభై యాభరు లచ్చల కట్నం ఇత్తమంటన్నరు మీరొక లచ్చ తక్కువిచ్చిన ఒప్పుకుంటం గాని పిల్ల.. మంచిశేడుకాడ రాజీపడం గదేమాకు ముక్కెం.. మానం అపిమానం ముక్కెం.. పిల్ల రంగు తక్కువేనంట గానీ తోలుదేమున్నదిలే కోస్క తింటమా.. గుణం పెదానం'' అన్నడు..
ఆటోల ఎక్కి కూసున్నంక వలరాజు నొక్కి నొక్కి అన్న మాటలే పిడుగుల్లెక్క మోగుతన్నరు శెవులల్ల... ఆలోచనల్ల బడ్డడు ఎంకయ్య.. ఆడపిల్లల గురించి వీళ్ళేంది గిట్ల మాటలంటన్నరు..'' ఆడిపిల్లల్ని ఎంత పాయిరంగ పెంచుకున్న.. బంగారు తల్లుల్ని నా గుండెల మీద నడిపిచ్చిన, కాళ్లకు మట్టంటనియ్యక పోతుంటిని.. గీ దోవల యాడన్న ముండ్లు దిగితె''... అనుకున్నడు.. అట్ల అనుకోంగనే.. మరింత బయమయ్యింది.. ఆటో నడుస్తాంది.. బయట మొగులు కమ్ముతాంది బూలచ్చిమి మనసులో గూడా.. గా రేత్రి ఎప్పుడొ ఎట్లనో మొదటాట ఇడిసే టయానికి ఊరుజేరిండు ఎంకయ్య..
ఊళ్లె బర్లన్నిటిని ఊరి బయట బీళ్లకు తోల్కపోతడు ఎంకయ్య.. ఒకో బర్రెకు బత్తడొడ్ల సొప్పున కుదురుచ్చుకుంటడు.. ఉగాది నుంచో దేవుడిపెళ్లికాణ్నుంచో లెక్కుంటుంది.. తెల్లపంచె మోకాళ్ల దాకుంటది సొక్కగూడ తెల్లదే తొడుక్కుంటడు.. తువ్వాలను తలకు అడ్డగుడ్డ సుట్టుకుంటడు.. నాలుగు సుట్టలో ఇంత పొవ్వాకో జేబులేసుకొని పొద్దున పదింటికల్లా బాటపడతడు.. ఇంటింటికి తిరుక్కుంట ''గొడ్లిడువురమ్మూవ్‌'' అని అరుసుకుంట కొన్నిళ్లల్లో తానే బోయి గొడ్లనిడుసుకుంట తోల్కపోతంటడు.. ఎంకయ్య అరుపులు అంత దూరం కాడికెల్లే పసిగడతరు బర్లు ఇనీ ఇనంగనే మోరెత్తి అరుస్తంటరు..
రొండురోజుల తరువాత.. ఇల్లెతుక్కుంటచ్చిండు రాము.. లోపలికచ్చుకుంటనే తానెవళ్ళో పరిశెయం జేసుకునెటాల్కె ఎందుకచ్చిండో అర్థమయ్యింది జానకికి.. కూసోమని కుర్శి ఏసింది యాదమ్మ.. ఎమో మాట్లాడుకుంటరని జెరింత పక్కకు బోయింది.. మాట్లాడుడు షురువు జేశిండు రాము
ఏం పేరు నీది
జానకి.. జాను అని గూడ పిలుస్తరు..
జానేంది.. తుర్కోళ్లలెక్క
తుర్కోళ్ళేంది..
ఎట్లనాలె..
ముస్లిం
ఎమ్మో.. పీరు గాడ్ని, చాందు గడ్ని, ఉస్మాన్‌ గాడ్ని, ఆస్మాన్‌ బీని గిట్లనే అంటం మా ఊళ్లె..
గదిడిశిపెట్టు
ఏది..
అదే.. గా కులం ముచ్చెట..
మళ్లైతె జానేంది
ముద్దుగ అంటరు గట్ల
ముద్దుగనా..
హా..
ముద్దుగంటె ముద్దుబెడతరా..
జస్ట్‌ ప్రేమగ..
ప్రేమగనా..ప్రేమిస్తరా..
హా..
ప్రేమిస్తరా..
ప్రేమతోనే పిలుస్తరు
నిజమా..
నిజమే.. ఎందుకంత ఆశ్చెర్యం..
ఎమో తేడా గొడ్తాంది..
తేడ ఏమున్నది..
గదే ముద్దన్నవ్‌, ప్రేమన్నవ్‌..
ప్రేమంటె ఏంటిది
నాకెర్కలేదా...
ఏమెర్క..
ఎన్ని సిన్మాల్లో జూపిస్తలేరు.. ఊళ్లె మాత్రం జూస్తలేమా.. కోమటోళ్ల పోరి, మంగలోళ్ల పోరడు, గౌండ్లోళ్ల పిల్ల, సాకలోళ్ల పోరడు, మాలోళ్లమ్మారు, వడ్రోల్లబ్బారు, మాదిగోళ్ల డేవిడు, సూద్రోళ్ల రాణి, గట్ల మస్తు నడుస్తన్నరు మఊళ్లె ప్రేమలు.. గోడల మీదికి సుత ఎక్కుతంటరు..
పెద్ద కులపోల్లరు లేవా గసుంటి ప్రేమ కతలు
ఎందుకుండయి ఉన్నరు..
మళ్ల..
అమ్మో.. గొడవలైతరు ఆళ్ల పేర్లెత్తితె.. అసుంటిరు గుసగుసగ అనుకోవాలె తర్వాత జెప్తలే శెవుల..
ఏం వద్దు గనీ నన్ను ప్రేమగ బిలుసుడంటె, ముద్దుగ బిలుసుడంటె.. గా ఉద్దేశం గాది.. ఆళ్ల బిడ్డెలెక్క శెళ్లె లెక్క జూసుకునుడు..
అవ్‌ గదు.. దాన్నిగూడ ప్రేమే అంటరు..
గీ పాయింటు ఎర్రంగీ ఏస్కున్నవేంది..
మంచినే ఉందిగా..
నాకు నచ్చది, లంగ ఓణీలు, శీరెలే గడతరు మా ఊళ్లె ఆడోళ్లు.
నువ్వు కపురు లేకుండచ్చినవ్‌ గా.. అచ్చేడిది ముందు ఎర్కైతే గట్లనే కట్టుకుందును.. గిప్పుడైతే మండలాఫీసుకు బోతన్న..
ఎందుకు
గాడ ధర్న జేశేడిదుంది..
ఏంది పారిటీల దిరుగుతవా..
హా... మహిళా సంఘం గ్రామ కార్యదర్శిని
సదువుతన్నవేమో..
హా.. అందుకనే పోరాటం నేర్చుకున్నా..
కర్టెన్‌ సాటుకెల్లి తొంగిసూస్తన్న ఆమెవళు
మా పెద్ద చెల్లి
గా కిటికీల
మా రెండోచెల్లె
గా ముసలామె
మా నాయనమ్మ
మీ అమ్మనాయినెటుబోయిన్లు
చెప్పినగదా
ఏం జెప్పినవ్‌
నువ్వు చెప్పొస్తే ఉండేవాళ్లని
ఎటుబోయిన్లు
అమ్మ పొలానికి, నాయిన బర్లు గాయనీకి
బయట హారన్‌ గొడతన్నరెవళు
మా నాయకులు..
ఎందుకు
చెప్పినగద మండల కేంద్రం బోవాల్నని
ఆళ్ల బండెక్కుతవా
హా..
గట్లనా అనుకుంట బయటికి ఎళ్లిపోయిండు రాము జనకి కన్నా ముంగట్నే..
గామాపటాళ్ల జంగిరికిదోల బరిగొడ్లు ఇళ్లకు మళ్లినరు.. వా.. హురు.. గొడ్ల అరుపులు, హై, హై అంటూ వాటితో కలుమెలి తిప్పుతూ, శేతిలోని తుమ్మ కట్టెతో వీపున ఒకటి సరుస్తా ''గొడ్లొచ్చినయమ్మూవ్‌'' అని అరుస్తా వాటిని ఇళ్లకు తొలుతున్నాడు ఎంకయ్య..
ఇంతల తనిల్లచ్చెటాల్కె సూడు బర్రెని, రొండు పడ్డల్ని లోపలికి దోలి మిగిలిన గొడ్లతో ముంగలికి బోయిండు.. 'జానికీ బర్లచ్చినరు జెర గట్టేసి గా మోపిప్పి ఎండుగడ్డేరు.. మీయమ్మ శేణుకాడికెల్లి పచ్చిమోపెత్తకత్తది గాని'' అని పురమాయించింది ఎంకయ్య తల్లి యాదమ్మ నులకమంచం లోగూసోని గోగునార పేనుతాందామె.. జానికి అప్పుడే తల్లికెదురుబోటానికి తయారైతంది.. చెప్పినపని జెయ్యకపోతె నాయనమ్మ బతకనియ్యదని కొట్టంలోకి బోయింది.. ''రాణీ.. గా సీరియళ్ళోళ్లచ్చి మనింట్ల పనులుజేస్తె మంచుండుపోనుగాదె అన్నది... నాయనమ్మ గట్లెందుకన్నదో అర్థమై సందకసుపు తియ్యనీకి బోతన్న నానమ్మా అన్నది.. పద్మా అంట్లు బయటేరు తోముతా.. గాబుగడిగి నీళ్లుతోడు'' అని కేకేసింది..
వారం తరువాత ఒకదినం.. పొద్దుగాళ్ల యాప్పుల్ల తల్లికింత ఇరిసిచ్చి తనొక పుల్లనోట్లేసుకున్నడు ఎంకయ్య.. పొలికట్టెతో ఆకిలూకుతన్నడు.. జానికి తెల్లారుజామున ఎప్పుడు లేసిందో బొక్కులు ముంగటేసుకొని ఇంక సదువుతనే ఉంది..
''ఎందుకే బుజ్జి నిదర శెడగొట్టుకొని లేసుడు గీకరోన పుణ్యమని పరీచ్చలు గూడ లేక పాయెనే'' అన్నది..
''మీ పంతు లికి జెప్పి నువ్వు సదివే
గా పీజో బోజో అండ్ల గీపాలి నా పేరు గూడ ఎక్కియ్యురే.. కరోన బేచ్చిల నన్నుసుత పాస్‌ జేస్తరు'' అనంగనే పడిపడినవ్వుతంది జానికి అడ్విల స్వచ్చ్చజెలపాతం దూకుతన్నట్టు నవ్వుతన్న బిడ్దెను కళ్లార్పకుండ జూస్తండు ఎంకయ్య..
''కానీయుండ్రి టీ అయితాంది'' అన్నది బూలచ్చిమి సుట్టింట్లె కందికట్టిరిసి పొయ్యిలబెట్టుకుంట..
''ఎక్వ ఇనకనీయకు ఇంకేమో అయితది'' అన్నది యాదమ్మ..
''బిడ్ద నువ్వు సుత గడుక్కోపో మొకం అనెటాలికె'' నేను కడుక్కోనేగూసున్న నాయిన అన్నది జానికి..
''ఏరు పాశిమొకంతో సదవాల్నే మంచిగబ్బుతది'' అన్నది యాదమ్మ గాబువైపు కదులుతూ..
ఉఫ్‌.. ఉఫని ఊదుకుంట శారు దాగుతన్న కొడుకు నడిగింది.. ''ఏమాయెరా గా పెళ్లి పిలాడచ్చి పాయె ఏమనుకున్నడొ కపురు జెయ్యకనేపాయె'' అంది..
''సరపంచు సెల్లుకు పోను జేసిన్లే మొన్న''..
''గట్లనా ఏమన్నరు''..
''ముందుగాల ఆళ్ల నాయినె మాట్లా డిండు.. మీ పిల్ల కాలేజి కాడ, మీ ఊళ్లె ఇంక వయిరి జేశిండట మావోడు.. నేననుకున్నదే అయ్యింది. గామె తరీక నచ్చలేదంట మావోనికి.. ఏమను కోకుర్రి మీ సమ్మందమొద్దు అంటండంగ గా పిలాడందుకొని మా స్నేయితుల్ని గనుక్కున్న, నేను రాముడ్నే గాని మీ పిల్ల సీత గాదు'' ...అన్నడు అని చెప్పిండు ఎంకయ్య ...
''గట్లనా నువ్వేమన్నవ్‌'' అన్నది యాదమ్మ ఆత్రపడతా...
''నువ్వు రాముడివే బాబు గందుకనే గట్ల మాట్లాడతన్నవ్‌ అని పెట్టేసినా'' అన్నడు ఎంకయ్య..
''మళ్ల సరుపంచు గారేమన్నరు'' అన్నది..
''గసుంటి అనుమానపోళ్లకిచ్చుడుకంటె బాయిలేసుకునుడు నయం'' అన్నడు అని చెప్పిండు ఎంకయ్య...
గొడ్లను శెరువు సికంలకు దోలి గట్టు మీద యాపసెట్టుకానుకొని కూసున్నడు ఎంకయ్య ఏమో లోతుగ ఆలోసిచ్చుకుంట.. వలరాజు ఫోనులో అన్న మాటలు మళ్లీ వినపడుతున్నాయి... ''ఏం పెంపకమయ్య అది.. మీ పిల్లకు గా పారిటోళ్లతో ఏం పని.. మీటింగులకి బోతదంటా.. ఒకోపాలి ఆళ్ల బండ్లెక్కి పోయొస్తదంట''..
''అయ్యా వాళ్లంత అన్నదమ్ములతో సమానం శెల్లె అని పిలుస్తరు, మా పిల్లలే గాదు ఊళ్లె ఆడిపిల్లలంత అన్న అన్న అనే అంటరు''...
''ఆ..ఆ.. అంటరంటరు తిరు.. అనంగనే అయిపోతరా అన్న శెల్లెళ్లు. అయిన గాని గా ఎర్ర జెండాలెందుకయ్యా.. ఇంగాడుందా పారిటీ అడ్విలుందా మైదానంలుందా చైనలుందా, రష్యలుందా.. అంతెందుకు బెంగాల్ల ఏమాయె దానికత.. మన రాష్ట్రంల ఉందా మీ జిల్లలుందా.. గిప్పుడాడ జూడు గులాబి జెండే మిగతయన్ని ఒడిసిపోయిన కతే.. ఏమో అన్న శెల్లెళ్లని బుకాయిత్తవ్‌. పైకిగిట్ల అన్నాని పిలుసుకుంట, శెల్లే అనీర్సుకుంటనే పెండ్లిళ్లు జేసుకున్నోళ్లనెంతమందిని సూపియ్యమంటవ్‌ గాపారిటీలళ్ల'' అనుకుంట ఫోన్‌ బెట్టేశింది యాదికచ్చింది... అంబా అని బర్రె అరుస్తుండటంతో ఆలోచనలకెల్లి దిగ్గున లేశి ఉరికిండు ఎంకయ్య మంగలోళ్ల లచ్చినర్సు మాళి బర్రె ఈనుతంటె పోయి సాయం బట్టిండు... పడ్డ పిల్లను భుజానేసుకొని బర్లు మలుపుకొన్నడు... ''లచ్చినర్సు బావని దావతడగాలె'' అనుకుంట..
మొగులు దట్టంగ కమ్మింది.. ఇగ పలపలమంటదనంగ ''శాపల్‌ పచ్చాపలేరు''.. అని కేకపెడుతా ఎంకయ్య ఇంటి ముంగటికెల్లి పోతాంది ముత్రాశోల్ల పుల్లమ్మ..
''ఒసేరు'' అని పిలుపుతో ఉలికిపడింది పుల్లమ్మ
''ఇది ముసల్దేగాని దీని గొంతు ముసల్దిగాదురా నాయిన'' అని మనసులో అనుకుంటా ఏందత్తా.. అన్నది.. ''రొండు కేజీలు తోమిపో''.. అనంగనే లోపలికి నడిసింది.. చీర దోపుకుంటన్న పుల్లమ్మ కెల్లి జూసుకుంట ''శాపల్లబుట్టి శాపల్ల బెరుగుట్ల నువ్వు సుత శాపవే అయినట్టున్నవ్‌ గా'' అన్నది యాదమ్మ ఎందుకన్నట్టు జూశింది పుల్లమ్మ ''శిల్కుశీరె శిల్కు జాకీట్లో పోటల్లా, జారిజారి పోటల్లా అన్నది యాదమ్మ సైన్మల అన్నట్టు..
''నిన్న మొన్నదాంక నువ్వూ బర్లు గాసెదానివంటగదత్తా' అన్నది పుల్లమ్మ శాపని బండకిరుద్దుతా..
వాన దంచికొడతంది.. కరెంటు పోతాన లాంతరు ఎలిగిస్తాంది జానికి అట్ల ఎలిగిస్తున్నప్పుడు సుట్టు సీకటున్నా బిడ్డ మొకం ఎలిగిపోతాన్నట్టు అనిపిచ్చింది ఎంకయ్య కండ్లకి..
''ఈ తల్లి బతుకు గిట్లనే ఎలగాల ఎప్పటికి శీకటిగాకుండ'' అని అనుకున్నడు ఎంకయ్య..
ఇంట్లో వాళ్లతో వాళ్ల మాటలతో సంబందం లేదన్నట్టు రేడియాల ఏవో కార్యక్రమాలు నడుస్తన్నరు.. కట్టెల పొయ్యి మీద శాపల పులుసుడుకుతన్న గుమగుమ.. బయట మట్టివాసన.. వానమాత్తరమే అందించే కానుక..
తాటాకు సూరు కారుతన్న నీళ్లని దోసిట్లకు పడతాంది పద్మ.. ఠాప్‌ ఠాప్నంటన్న వడగండ్లేరతాంది ''ఎరు అయి తినగూడదే సలికాలం సలిబెదతది'' అంటూ అటు దిక్కు తిరుక్కుంట.. ''జానికీ'' అని పిలిసింది యాదమ్మ.
''ఏంది నాయినమ్మ'' అనుకుంట తల్లికాడ్నుంచి ఇటొస్తాంది జానికి.
''రేడియాకి కరోన అచ్చిందా''.. అని అడిగింది యాదమ్మ
''కరోన ఎట్లస్తదో, రాకుంట ఏం జేయాల్నో చెప్తది రేడియో అంతెగాని దానికెందుకస్తది'' అన్నది జానికి...
''ఇందాకటిసంది అది గరగర మాట్లాడుతాంటె అనుమానమచ్చిందే'' అన్నది..
''వాతవరనం బాగలేకలేవే'' అన్నడు ఎంకయ్య సుట్టసుట్టుకుంట..
''వాతవరనం బాగుందిరా'' అన్నది యాదమ్మ బయిటికి సూసుకుంట...
ఇంతల అన్నం బెట్టకచ్చింది బూలచ్చిమి.. ముగ్గురు మనవరాళ్లకి ఒకే కంచంలో అన్నం కలిపింది యాదమ్మ.. శాప ముళ్లు ఏరుకుంట ఒకో ముద్ద తినబెడతాంది.. ఎప్పుడు శాపల కూరైనా గట్లనే తినబెడ్తుంది గామె... ''ఒరే దడి బాతనీకి కంప గొడతనన్నవ్‌ గా''.. అన్నది యాదమ్మ..
''అవ్‌ అమ్మ కుదుర్తలేదు'' అన్నడు యాదయ్య ముద్ద గలుపుకుంట..
''అద్దులే ముండ్లు బాగనే ఎల్లెటట్టున్నరు'' అని యాదమ్మ అనంగనే పక్కున నవ్విన్లు ముగ్గురు మనవరాళ్లు.. నవ్వుతున్న బిడ్డెల్ని మురిపెంగ సూసుకుంటన్నడు ఎంకయ్య ముద్ద మింగటం మరిసి..
గా తెల్లారి మండలాపీసు కాడ ఏదో దర్నకు బోటందుకు తయారైతన్నది జానికి.. తెల్ల లంగమీద ఎర్ర ఓణిగట్టింది.. ఇంతల కొడుకునుతోగలిసచ్చిండు జంగిరెడ్డి.. ఆళ్లని సూసొ సూడంగనె యాదమ్మ మంచంలకెల్లి దిగ్గున లేసుకుంట అయ్య, దొర ఏందిటచ్చిన్లు.. సెప్పంపితె అచ్చెటోళ్లంగద అన్నది.. ఏం లేదులే ఊకెనె అచ్చిన మావోడు రేపు ఎల్లిపోతడంట అమిరికకు ఊళ్లె వాని సవాసగాళ్లని గిట్ల తెలిశినోళ్లనందరిని మందలిచ్చస్తనంటె గిట్ల తిరుక్కుంటస్తన్నం. అన్నడు నింపాదిగ..అప్పటికే జానకిని పలకరిచ్చిండు జంగిరెడ్డి కొడుకు..
ఎటొ వోతున్నట్టున్నది
హా.. ఎమ్మెర్వో ఆఫీస్‌ కాడ దర్న ఉన్నది
ఇంక గా పార్టీలనే ఉన్నరా అయితే
ఒంట్లె ఎర్ర రక్తమున్నంతకాలం గట్లనే ఉంటమయ్య..
ఆళ్ల తాత వారసత్వాన్ని నిలవెడ్తాందైతే మీ మన్మరాలు
అంతగొప్ప త్యాగాలు ఇప్పుడెక్కడియె లే..
అమెరికాల గూడ యూత్‌ పొలిటికల్‌ ఇంట్రెస్ట్‌ ఎక్కువుంతది ముఖ్యంగ లెఫ్ట్‌ వింగ్‌ అజిటేషన్స్‌లో యూత్‌ మెయిన్‌ రోలుంటరు... యూనివర్సిటీ స్టూడెంట్స్‌ అన్యాయాలు, దోపిడీ, వివక్ష పోరాటాలు చేస్తూనే ఉంటరక్కడ.. పోరాటాల్లో యువత ఎప్పటికీ ఒక గొప్ప ఉత్తేజితం..
చా బెట్టరాదే
నువ్వు మాట్లాడిరార నేను పొలంకాడికి బోయేటి పనున్నది.
చా దాగి పోదురు దొరా
అద్దులే తాగి తాగస్తన్నం.. ఓ రెక్క అందుకుంటనే ఉన్నడుగా చా గిలాస మావోడు... ఇంటికాడైతే ఇన్ని మాట్లు దాగడు పిలాస్కుల చా అసలు దాగడు.. సరే నేనుబోతన్న
అవునా..
ఏంటి
చారు గురించి సరుపంచ్‌ గారు జెప్పింది
హా.. కానీ నీ చేతి చా తాగాలనిపిచ్చింది



శెక్కెర మంచిగనే ఏశినా
అర్థమైతన్నది
మళ్లెప్పుడు
ఏంది
అచ్చేటిది
ఈసారస్తే ఈడ్నే ఉండుడు అనుకుంటున్న
గదేంది
ఎవుసం జేసుడంటె ఇష్టం.. రైతుగ ఉండుడు ఇష్టం సరె గాని నువ్వేం జేస్తన్నవ్‌
పీజీ మాస్‌ కమ్యునికేషన్స్‌ జేస్తన్న ఇగోగిట్ల ఊళ్ళెన్నప్పుడు మా పార్టీ కార్యక్రమాలల్ల పాల్గొంటుంట...
ఎంకయ్య రాంగనే శెప్పుడు షురూ జేశింది యాదమ్మ.. ''సరపంచచ్చి పోయిండురా మనింటికి''
''అవునా ఏందట ..
''సిన్నప్పటి దోస్తులందర్ని ఇళ్లకు బోయి కలుస్తన్న మళ్ల రేపెల్లిపోత'' అన్నడు...
''అవ్‌ మన జానికి ఆయినె శిన్నప్పుడు ఒక్కబడేగద''
''మీ కలాస్‌ మేటా బుజ్జీ''
''లేదు నాయిన మా సీనియర్‌''
''గట్లనా'' అన్నడు ఎంకయ్య గాబుకాడ కాళ్లుగడుక్కుంట.. కండవ అందిచ్చింది బూలచ్చిమి.. తుడుసుకుంటంటె.. ''గా పిలాడు పోత పోత మన పందిరికి జెక్కున్న గా ఎర్ర జెండ పట్క పోయిండురా దానికెల్లి ఖాయిష్గ జూసుకుంట''..అన్నది యాదమ్మ.
''అట్లనా ఆళ్లు గారుగా మనపారిటి'' అన్నడు ఎంకయ్య మొకం దుడుసుకుంట..
''అయితడేమోరా'' అన్నది యాదమ్మ..
సీత బుగ్గల్లో ఎర్రజెండలు పాయిరంగ జూస్తున్నడెంకయ్య..
''ఎక్వకులమోల్లందరు తక్వ మనసోళ్లుగాదురా'' అన్నది యాదమ్మ.. జానకి కలగనలేదు.. అనెవళో కూనిరాగం దీస్తన్నరా ఇంట్లె..