హైదరాబాద్ : హైదరాబాద లోని డీఏవీ స్కూల్లో నాలుగేండ్ల బాలికపై ప్రిన్సిపాల్ కారు డ్రైవర్ లైంగికదాడికి పాల్పడిన ఘటన సంచలనం సృష్టించిన సంగతి తెలిసిందే. ఈ ఘటనపై మెగాస్టార్ చిరంజీవి స్పందించారు. ఈ మేరకు ఆయన ట్వీట్ చేశారు. నాలుగేండ్ల పసిబిడ్డపై స్కూల్ లో జరిగిన లైంగికదాడి, అఘాయిత్యం తనను బాగా కలచివేసినట్టు తెలిపారు. అటవిక సంస్కృతి నుంచి ఆనవాళ్లు మోసుకొస్తున్న కొందరు మృగాళ్ల వికృత చేష్టలకు కఠినాతి కఠినమైన శిక్షలు వేగవంతంగా విధించాలని కోరారు. అంతేకాకుండా, ప్రభుత్వాలు అన్ని విద్యాసంస్థల్లో సీసీ టీవీ కెమెరాల ఏర్పాటుకు యుద్ధ ప్రాతిపదికన తక్షణ చర్యలు తీసుకోవాలని కోరుకుంటున్నట్టు తెలిపారు. భావితరాలకు భరోసా కల్పించడం మనందరి సమష్టి బాధ్యతగా భావిస్తున్నాను అని పేర్కొన్నారు. ఇలాంటి భయానక ఘటనలు ఇంకెప్పుడూ జరకుండా చూడాలన్నారు.