హైదరాబాద్ : రాష్ట్రంలోని ఏడు యూనివర్సిటీలకు తెలంగాణ ప్రభుత్వం కామన్ అకాడమిక్‌ క్యాలెండర్‌ను విడుదల చేసింది. డిగ్రీ మొదటి సెమిస్టర్‌, పీజీలోని 1, 3 సెమిస్టర్లకు సంబంధించిన అకాడమిక్‌ క్యాలెండర్‌ను ఈ మేరకు తెలంగాణ ఉన్నత విద్యామండలి చైర్మన్‌ ప్రొఫెసర్‌ లింబాద్రి బుధవారం విడుదల చేశారు. దీని ప్రకారం ఉస్మానియా, కాకతీయ, మహాత్మా గాంధీ, పాలమూరు, శాతవాహన, తెలంగాణ, తెలంగాణ మహిళా యూనివర్సిటీల్లో డిగ్రీ, పీజీ కోర్సుల్లో చేరిన విద్యార్థులందరికీ ఒకేసారి తరగతులు ప్రారంభించి, ఇంటర్నల్స్‌, సెమిస్టర్‌ పరీక్షలు నిర్వహించనున్నారు. ఇప్పటివరకు రాష్ట్రంలోని ఏడు యూనివర్సిటీలకు వేర్వేరు అకాడమిక్‌ క్యాలెండర్లు ఉండేవి. దీనివల్ల ప్రవేశ పరీక్షల నిర్వహణ, ఫలితాల ప్రకటనలో సమస్యలు వస్తున్నాయి. ఈ నేపథ్యంలో అన్ని వర్సిటీలకు కలిపి కామన్ అకాడమిక్‌ క్యాలెండర్‌ను విడుదల చేశారు.
