అమరావతి : ఆంధ్రప్రదేశ్‌ ప్రెస్‌ అకాడమీ చైర్మెన్‌గా సీనియర్‌ జర్నలిస్ట్‌ కొమ్మినేని శ్రీనివాసరావును నియమిస్తున్నట్టు తెలిసింది. కృష్ణా జిల్లా గన్నవరానికి చెందిన కొమ్మినేని శ్రీనివాసరావు 1978 నుంచి జర్నలిజంలో వున్నారు. ఈనాడు పత్రికలో వివిధ హోదాల్లో దాదాపు 24 సంవత్సరాలపాటు పనిచేశారు. 2002లో ఆంధ్రజ్యోతి దినపత్రిక పున:ప్రారంభం అయినపుడు బ్యూరోచీఫ్‌గా పనిచేశారు. 2007 నుంచి ఎలక్ట్రానిక్‌ మీడియాలో పనిచేస్తున్న శ్రీనివాసరావు ఎన్‌ టివి తర్వాత సాక్షిలో చేరారు. ప్రస్తుతం సాక్షి టివిలో పొలిటికల్‌ డిబేట్లకు వ్యాఖ్యాతగా పనిచేస్తున్నారు. వచ్చే నెల 7వ తేదీతో ప్రస్తుత ప్రెస్ అకాడమీ చైర్మెన్ శ్రీనాథ్ రెడ్డి పదవీ కాలం ముగియనుంది. ఈ నేపథ్యంలో నూతన ప్రెస్‌ అకాడమీ చైర్మెన్ గా కొమ్మినేని శ్రీనివాసరావును నియమిస్తూ ఉత్తర్వులు త్వరలో వెలువడే అవకాశం వున్నట్లు సమాచారం.