లండన్ : బ్రిటన్ మాజీ ప్రధాని లిజ్ ట్రస్ వ్యక్తిగత ఫోన్‌ను రష్యా అధ్యక్షుడు వ్లాదిమిర్ పుతిన్ హ్యాక్ చేయించాడన్న వార్తలు సంచలనం సృష్టిస్తున్నాయి. ఈ మేరకు డైలీ మెయిల్ వార్తా పత్రిక ఒక కథనాన్ని ప్రచురించింది. ట్రస్ బ్రిటన్ విదేశాంగ మంత్రిగా ఉన్న సమయంలో ఆమె దగ్గర పని చేసిన పుతిన్ ఏజెంట్లు ఆమె ఫోన్ హ్యాక్ చేశారని పేర్కొంది. సదరు ఏజెంట్లు ట్రస్ సన్నిహిత మిత్రుడు క్వాసీ క్వార్టెంగ్‌తో చేసిన ప్రయివేటు సందేశాలతో పాటు అంతర్జాతీయ మిత్రదేశాలతో చర్చల్లో అత్యంత రహస్య వివరాలను తెలుసుకున్నారని తెలిపింది. ఈ సందేశాలలో ఉక్రెయిన్‌లో యుద్ధం గురించి, ఆయుధాల రవాణాకు సంబంధించిన వివరాలతో సహా వివిధ దేశాల విదేశాంగ మంత్రులతో చర్చలు ఉన్నాయని డైలీ మెయిల్ చెప్పింది. దాదాపు ఒక సంవత్సరం పాటు ట్రస్ ఫోన్ నుంచి ఈ సందేశాలను హ్యాక్ చేశారని తెలిపింది. జాన్సన్‌పై ట్రస్, క్వార్టెంగ్ చేసిన విమర్శలను కూడా హ్యాక్ చేశారని... ఇవి బ్లాక్‌మెయిల్ ప్రమాదానికి దారితీసింది పేర్కొంది.
