హైదరాబాద్ : పవర్ స్టార్, జనసేన అధినేత పవన్ కల్యాణ్ తో నటుడు, వైసీపీ నేత ఆలీ మంచి స్నేహితులు
అన్న సంగతి తెలిసిందే. అయితే ఆలీ వైసీపీలోకి వెళ్లిన తర్వాత ఇద్దరి మధ్య గ్యాప్ వచ్చినట్టు వార్తలు వచ్చాయి. అలాగే పవన్ గత రెండు చిత్రాల్లో ఆయన కనపడలేదు. దాంతో ఇద్దరి మధ్య స్నేహం చెడింది అనే వార్తలు వచ్చాయి. దీనిపై తాజాగా అలీ స్పందించారు. ఓ సినిమా ప్రమోషన్ లో ఆయన మాట్లాడుతూ..
పవన్ తాజా చిత్రాలైన వకీల్ సాబ్ః, భీమ్లానాయక్ సినిమాలు చాలా సీరియస్ చిత్రాలని... అందులో కామెడీ లేదని, అందుకే వాటిలో తాను నటించలేదని చెప్పారు. ఆ చిత్రాల్లో తానే కాదు, ఏ కమెడియన్ కూడా లేరని అన్నారు. పవన్ సినిమాల్లో కామెడీ ఉంటే తనను కచ్చితంగా పిలుస్తారని చెప్పారు. తన 'ఆలీతో సరదాగా` టీవీ షోకు పవన్ కల్యాణ్ కచ్చితంగా వస్తారని తెలిపారు. తన షోకు వస్తానని ఆయన తనతో చెప్పడం కూడా జరిగిందని... అయితే, ప్రస్తుతం ఆయన చాలా బిజీగా ఉన్నారని చెప్పారు.
