సిడ్నీ: మహిళపై లైంగిక దాడి కేసులో శ్రీలంక క్రికెటర్‌ ధనుష్క గుణతిలక అరెస్టయ్యాడు. ఈ తెల్లవారుజామున సిడ్నీకి చెందిన సీటీ పోలీసులు గుణతిలకను అదుపులోకి తీసుకున్నారు. ధనుష్క గుణతిలక ఆస్ట్రేలియాలో ప్రపంచకప్‌ ఆడేందుకు గత నెల తన జట్టుతో కలిసి వెళ్లాడు. ఈ నెల 2న ఓ మహిళపై లైంగిక దాడికి పాల్పడినట్లు ఆరోపణలు రావడంతో అతనిపై కేసు నమోదైంది. దాంతో వరల్డ్‌కప్‌ నుంచి నిష్క్రమించిన శ్రీలంక జట్టు గుణతిలకను ఆస్ట్రేలియాలోనే వదిలేసి స్వదేశానికి వెళ్లిపోయింది. కాగా, ప్రపంచకప్‌ ఆడేందుకు ఆస్ట్రేలియాకు వెళ్లిన గుణతిలక ఫస్ట్‌ రౌండ్‌లో నమీబియాతో జరిగిన ఒకే ఒక మ్యాచ్‌ ఆడి డకౌట్‌ అయ్యాడు. గాయం కారణంగా ఆ తర్వాత టోర్నీకి దూరమై రిజర్వ్‌ బెంచ్‌కే పరిమితమయ్యాడు. ఈ క్రమంలో ఓ 29 ఏండ్ల మహిళ గుణతిలకపై రేప్‌ ఆరోపణలు చేశారు.
శ్రీలంక క్రికెటర్‌తో తనకు ఆన్‌లైన్‌ డేటింగ్‌ యాప్‌ ద్వారా పరిచయం ఏర్పడిందని, అప్పటి నుంచి ఇద్దరం ఒకరికొకరం ఆన్‌లైన్‌లో టచ్‌లో ఉన్నామని బాధితురాలు తెలిపింది. ఈ క్రమంలో ఈ నెల 2న సాయంత్రం రోజ్‌ బేలోని తన నివాసానికి వచ్చిన గుణతిలక తనపై లైంగిక దాడికి పాల్పడ్డాడని ఆరోపించింది. ఈ నేపథ్యంలో పోలీసులు అతనిపై కేసు నమోదు చేసి అరెస్ట్‌ చేశారు.
