హైదరాబాద్: 2008లో దీపిందర్ గోయల్ పంకజ్‌ చద్దా ప్రారంభించిన జొమాటో ఆన్‌లైన్‌ ఫుడ్ డెలివరీ సంస్థ మనకు సుపరిచితమే. అయితే జొమాటోకు సహ వ్యవస్థాపకుడిగా ఉన్న మోహిత్ గుప్తా జొమాటోకు రాజీనామా చేశారు. నాలుగున్నరేళ్లు కంపెనీతో కొనసాగిన ఆయన శుక్రవారం రాజీనామా లేఖ రాశారు. కో-ఫౌండర్‌గా ఉన్న మోహిత్ జొమాటోను వీడడం కంపెనీకి ఎదురుదెబ్బ. ఎందుకంటే వారం రోజుల వ్యవధిలోనే జొమాటో ఉన్నత స్థాయి ఉద్యోగులు ముగ్గరు రాజీనామా చేశారు. జొమాటో న్యూ ఇనిషియేటివ్‌ హెడ్ రాహుల్ గంజూ, జొమాటోస్ ఇంటర్‌సిటీ లెజెండ్స్ సర్వీస్ హెడ్ సిద్ధార్థ్‌ ఝావర్‌లు వారం రోజుల వ్యవధిలోనే కంపెనీకి రాజీనామా చేశారు. జొమాటోలో చీఫ్‌ ఎగ్జిక్యూటివ్‌గా ఉన్న మోహిత్ తన పనితీరుతో 2020లో కో-ఫౌండర్‌ స్థాయికి ఎదిగారు. నేను నాలుగున్నర ఏళ్ల కింద జొమాటోలో చేరాను. ఈ సంస్థను మనదేశంలోనే బెస్ట్ ఫుడ్ టెక్ కంపెనీగా మార్చాలనే లక్ష్యంతో పనిచేశాను. ఇతర ఫుడ్ డెలివరీ సంస్థల నుంచి పోటీ ఎదురైనా, ప్యాండెమిక్ టైంలో నష్టాలు వచ్చినా కూడా మళ్లీ లాభాల బాటలో నడిచాం అని మోహిత్ తెలిపారు.
