హైదరాబాద్: రష్యా రాజధాని మాస్కో ఉత్తరాన శివారు ప్రాంతమైన ఖిమ్కిలో షాపింగ్‌ మాల్‌లో శుక్రవారం తెల్లవారుజామున భారీ అగ్నిప్రమాదం చోటుచేసుకుంది. మంటలను అదుపు చేసేందుకు అగ్నిమాపక సిబ్బంది ప్రయత్నిస్తున్నారు. ఫుట్‌బాల్‌ క్రీడా మైదానం మేర విస్తీర్ణంలో ఉన్న షాపింగ్‌ మాల్‌ అంతటా మంటలు వ్యాపించాయి. కొన్ని పేలుడు శబ్దాలు కూడా వినిపించాయి.
                ఈ తరుణంలో ఆ షాపింగ్‌ మాల్‌ భవనంలో ఉంటున్న నివాసితులు, సిబ్బంది అక్కడి నుంచి బయటకు పరుగులు తీశారు. దీంతో సమాచారం అందుకున్న  ఫైర్‌ఫైటర్లు అక్కడకు చేరుకొని మంటలను అదుపు చేసేందుకు ప్రయత్నించారు. అయితే ఎవరో ఉద్దేశపూర్వకంగానే మంటలు రాజేసి ఉంటారని రష్యా అత్యవసర సేవల మంత్రిత్వ శాఖ అనుమానం వ్యక్తం చేసింది.  ఈ భారీ అగ్నిప్రమాదం వీడియో క్లిప్‌లు సోషల్‌ మీడియాలో వైరల్‌ అయ్యాయి.