హైదరాబాద్‌: సీనియర్‌ నటుడు చలపతిరావు మరణవార్తతో దిగ్భ్రాంతికి గురైనట్లు జనసేన అధినేత పవన్‌కల్యాణ్ అన్నారు. ఆయన ఆత్మకు శాంతి చేకూరాలని కోరారు. చలపతిరావు మృతిపట్ల సంతాపం తెలుపుతూ పవన్‌ ప్రకటన విడుదల చేశారు. ‘‘ప్రముఖ నటుడు చలపతిరావు మృతి చెందడం బాధాకరం. ఆయన ఆత్మకు శాంతి చేకూరాలని దేవుడిని ప్రార్థిస్తున్నాను. ప్రతినాయకుడిగానే కాకుండా సహాయనటుడిగానూ తనదైన శైలిలో ఆయన ప్రేక్షకుల్ని అలరించారు. నిర్మాతగా ఎన్నో మంచి చిత్రాలు నిర్మించారు. ఆయన కుమారుడు, నటుడు, దర్శకుడు రవిబాబు, ఇతర కుటుంబసభ్యులకు నా ప్రగాఢ సానుభూతి తెలియజేస్తున్నా. తెలుగు సినీ పరిశ్రమలో ఒక తరానికి ప్రతినిధులుగా ఉన్న సీనియర్‌ నటులు ఒక్కొక్కరుగా ఇలా కాలం చేయడం దురదృష్టకరం’’ అని పవన్‌ పేర్కొన్నారు.